குதிக்குற குதிக்குற குதிரைக்குட்டி…

அழகர்சாமியின் குதிரை பாடல்கள் குறித்து இணையத்தில் முதலில் வந்து விழுந்த விமரிசனங்கள் எல்லாமே எதிர்மறையாக மட்டுமே இருந்தன. ‘எந்தப்பாடலுமே இளையராஜா தரத்தில் இல்லை’, ‘இளையராஜா ஏமாற்றிவிட்டார்’ – இப்படி. அதனால் பாடல்கள் கேட்கும் ஆர்வம் எனக்கு உடனே ஏற்படவில்லை. வார இறுதியில்தான் பாடல்களைக் கேட்டேன். ஏமாந்துபோனதை உணர்ந்தேன். பாடல்களால் அல்ல, பாடல்கள் குறித்த விமரிசனங்களால்.

நந்தலாலாவுக்குப் பிறகு இளையராஜாவின் மிக முக்கியமான ஆல்பம்.

அடியே இவளே ஊருக்குள்ள திருவிழாவாம்…

மிக மிக வித்தியாசமான பாடல். இந்தப் பாடலின் கட்டமைப்பை நினைத்தால் வியப்பாக இருக்கிறது. எத்தனை விதமான குரல்கள். எத்தனை விதமான இசைக்கருவிகள். எல்லாம் கிராமிய இசைக்கருவிகள். தமிழர் பண்பாட்டு இசைக்கருவிகள் குறித்து குங்குமத்தில் தொடர் எழுதிவரும் நண்பர் நீலகண்டன், இந்தப் பாடல் குறித்து ஏதாவது கட்டுரை எழுதுவார் என்று காத்துக் கொண்டிருக்கிறேன். இந்தப் பாடல் உருவான விதம் குறித்து வீடியோ எதுவும் பதிவு செய்யப்பட்டிருந்தால் அது நிஜமாகவே கலைப் பொக்கிஷம். ஈசன் – ஜில்லாவிட்டு பாடல் புகழ் தஞ்சை செல்விக்கு அமைந்துள்ள மற்றுமொரு அழகான பாடல்.

பூவைக்கேளு காத்தைக்கேளு…

அசல் இளையராஜா பிராண்ட் மெலடி. மீண்டும் கார்த்திக், ஷ்ரேயா கோஷல். புதிதாக எதுவும் சொல்லத் தோன்றவில்லை. ஆனால் கேட்கச் சலிக்காத மென்பாடல். பண்பலை வானொலிகளால் சற்றே கவனிக்கப்படும் பாடல் இதுதான். இரவு நேரத் தூக்கத்துக்கு முன் கேட்கும் பாடல் பட்டியலில் இதையும் சேர்த்துக் கொண்டுவிட்டேன்.

குதிக்கிற குதிக்கிற குதிரைக்குட்டி…

இந்த ஆல்பத்தின் ஸ்டார் பாடல் இதுவே. குதிக்கிற குதிக்கிற என இளையராஜா அசட்டுக் குரலில் பாடும்போது எனக்குள் இனம்புரியாத துள்ளலை உணர்ந்தேன். எத்தனைவிதமான மாடுலேஷன். பாடலைக் கேட்கும்போது அந்தக் குரலில் படத்தில் கதாநாயகனான அப்புகுட்டியின் முகம் என் கண்முன் விரிந்தது. ரசித்துக் கொண்டே இருக்கலாம், காலத்துக்கும். இந்தப் பாடலுக்கான விஷுவல்ஸ் அவ்வளவு அருமையாக வந்திருக்கிறதென சினிமா துறை நண்பர் ஒருவர் சொன்னார். வெள்ளிக்கிழமை வரை காத்திருக்க வேண்டும்.

நண்பர் பாஸ்கர் சக்திக்கு என் வாழ்த்துகள்.

படம் குறித்து இளையராஜா, குமுதத்தில் (23.03.2011) பகிர்ந்துகொண்ட கருத்து இது.

ஃபாரின் படங்களைப் பார்த்துட்டு அதுமாதிரி புதுசா சிந்தனை பண்ணி படம் எடுக்க ஆளில்லை. அந்தப் படத்தையே அப்படியே எடுக்க வேண்டியிருக்கு. சமீபத்துல அப்படி ஒரு படத்தை மீடியாக்கள் பாராட்டின அளவுக்கு மக்கள் ரசிக்கலையே. இந்த பாதிப்பு இனி வர்ற நல்ல படங்களுக்கு வந்திடக்கூடாதுங்கற அக்கறையாலதான் இப்ப நான் பேசுறேன். நான் இசையமைக்குற படம் என்பதால சொல்லலை. நான் வேலை செய்யாத நல்ல படங்களும் தோல்வி அடைஞ்சிருக்கு. இது வருத்தமா இருக்கு. உலகத் தரத்தில் படம் எடுக்க நம்ம ஊர்லயும் ஆள் இருக்காங்க என்பது மாதிரி ‘அழகர்சாமியின் குதிரை’ படத்தை எடுத்திருக்காங்க. இதுக்கு ஜனங்க சரியான முறையில் ஆதரவு கொடுத்தால்தான் சினிமாவில் ஆரோக்கியமான சூழல் ஏற்படும்.

8 Comments

  1. Haranprasanna says:

    அடியே இவளே பாடல் தொடக்கம் அருமை. இடையில் கொஞ்சம் தொய்ந்தது போல தோன்றியது. மற்ற இரண்டு பாடல்கள் சூப்பர்.

  2. அப்பா! இப்பவாவது சுருக்கமா ஒரு விமர்சனம் நல்லபடியா வந்ததே… :)

    குதிக்குற குதிக்குற பாட்டை முதல் தரம் கேட்டதுமே… முகநூலில் மொட்டை இந்த வயசுலயும் குழந்தைத்தனமா பாடுறாரேயான்னு எழுதினேன். ராஜாவின் துள்ளல் குரலும் இசையும் பாடல் வரியை என்னை நீண்ட நேரம் யோசிக்க விடவில்லை. பலமுறைகள் பாடலைக் கேட்ட பிறகே ஓ! இது குதிரைய நெனச்சு பாடுறதான்னு தோனுச்சு :)

  3. நான் எழுத நினைத்ததை அப்படியே எழுதியிருக்கிறீர்கள்.பூவைக்கேளு காத்தைக்கேளு கொஞ்சம் நந்தலாலாவின் கைவீசி நடந்திடும் காற்றே பாடலைன் சாயலைப் ,போல இருந்தது,ஆனால் பாடல் மிக மிக இனிமை,புதுமை .இசைஞானி இந்த படத்தில் ஏமாற்றவேயில்லை குதிக்கிற குதிக்கிற பாட்டு மிக மிக வித்தியாசமான முயற்சி, நந்தலாலாவிலேயே ஒரு வாண்டுக்கூட்டமே தய்யா தய்யா என்று மிக அற்புதமாக மாடுலேஷனில் மிக அழகிய பாடலை கொடுத்திருந்தார். துரதிர்ஷ்டமாக அப்பாடல் படத்தில் இல்லை,ஆமை வேக படத்தை சற்று வேகம் கூட்டி அந்த பாடலையும் படத்தில் வைத்திருக்க முடியும்,ஆனால் அது விழலுக்கு இறைத்த நீரானது,அழகர்சாமி குதிரையில் முழுப்படத்தையும் பார்த்துவிட்டு இதற்குள் இடைச்செருகலாக பாடல்கள் இருத்தல் கூடாது என்று தான் வெறும் மூன்றே பாடல்களை கொடுத்திருக்கிறார். பிண்ணணி இசை பிரமாதமாக வந்திருக்கிறதாம். காத்திருப்போம். இசைஞானியை நாம் ஆத்மார்த்தமாக கொண்டாடுவது அவர் செய்துகொண்டிருக்கும் இசை சாதனைக்காக அல்ல,அவர் என்றோ செய்துவிட்ட இமாலய இசை சாதனைகளுக்காகத்தான்.நம்மில் அநேகம் பேருக்கு பொறுமையே இருப்பதில்லை,எல்லாம் துரித உணவு வாழ்க்கை படுத்தும் பாடு.

  4. “தீராததே ஆ[சை]ச வேறென்ன நா[ன்] பேச”
    பூவையும் காற்றையும் கேட்ட நாளிலிருந்து அமைதியான தருணங்களில் என்னையறியாமலேயே என்னுள் ஒலித்துக்கொண்டிருக்கும் வரிகள்.
    அதேபோல் அய்யனில் வரும் “மனதோரம் நிலா வந்து முகம் காட்டும்”

  5. karthikeyan says:

    மிகவும் நன்றி.நான் நினைத்ததை அவ்வாறே எழுதி உள்ளீர்கள்.பலருக்கு ஏன் பாடல் பிடிக்க வில்லை என்று அறியேன்.ராப் பாப் கேட்டு கேட்டு அவர்களின் காதுகள் திறமையை இழந்துவிட்டது என்று தான் தோன்றுகிறது.நன்றி என் த்வீடுக்கும் மதிப்பு கொடுத்து றேபலி செய்ததற்கு @get2kg

  6. g b says:

    i like geethappriyan comments

  7. Rajkumar says:

    நல்ல பாடல்கள்

Leave a Reply